Azərbaycan və Belarus şirkətləri arasında 55 milyon dollar dəyərində müqavilələr imzalanıb. Bu barədə 19 may tarixində APA məlumat verib.
Belarus Ticarət-Sənaye Palatasının sədrinin sözlərinə görə, əsas müqavilələr ağac emalı sektorunda bağlanıb. Bunlara faner (17,9 milyon dollar), taxta piltələr (14,4 milyon dollar), laminat döşəmə (7,4 milyon dollar), taxta-şalban (2,1 milyon dollar), yapışqan faner (5,3 milyon dollar), üçqat sellülozla üzlənmiş taxta (2,4 milyon dollar) tədarükü üzrə müqavilələr daxildir.
Məlumatda bildirilib ki, həmçinin qida sahəsinə aid tədarükə dair kommersiya müqavilələri imzalanıb: quru süd məhsulları (2 milyon dollar), uşaq qidası və digər ixtisaslaşdırılmış məhsullar (1,2 milyon dollar).
Bundan əlavə, 1 milyon dollar dəyərində şüşə və büllur məmulatlarının tədarükünə dair müqavilə imzalanıb.