Bu gün Bakının Xətai və Suraxanı rayonlarının təbii qazla təchizatı müvəqqəti dayandırılacaq. Bu barədə 19 noyabr tarixində “Azəriqaz” İstehsalat Birliyi məlumat verib.
Xətai rayonunun Nəcəfqulu Rəfiyev küçəsində abadlıq işləri ilə əlaqədar qaz tənzimləyicinin və qaz xəttinin yerinin dəyişdirilməsi, eləcə də Suraxanı rayonunun Qaraçuxur qəsəbəsinin Kərəm İsmayılov və Mədən küçələrinin kəsişməsində yerləşən yaşayış binasına çəkilmiş qaz xəttinin şəbəkəyə qoşulması məqsədi ilə bu gün saat 10:00-dan etibarən işlər başa çatanadək qaz təchizatının dayandırılması planlaşdırılır.
Təmir işləri aparılan müddətdə Xətai rayonunun Ağ şəhər, Mehdi Mehdizadə, Sabit Orucov, İ.Orucov, Fəzail Bayramov, Natiq Əliyev, Afiyəddin Cəlilov, Nəcəfqulu Rəfiyev küçələrinin, həmçinin Xocalı və Babək prospektlərinin bir hissəsinin, Suraxanı rayonunun isə Qaraçuxur qəsəbəsinin qaz təchizatında müvəqqəti fasilə yaranacaq.