Gəncənin növbəti dəfə raket atəşinə tutulmasından altı il ötür.
17 oktyabr 2020-ci ildə Ermənistan silahlı qüvvələri Azərbaycanın ikinci böyük şəhəri olan Gəncəni beşinci dəfə raket atəşinə tutub. Gecə saat 01:00-da atılan raket Aida İmanquliyeva və Samir Xasıyev küçələrində yerləşən əhalinin sıx yaşadığı əraziyə düşüb.
Hadisə zamanı 20 ev dağılıb, xeyli sayda mülki şəxs dağıntının altında qalıb. Nəticədə dinc sakinlərdən 15 nəfər həlak olub, 54 nəfər yaralanıb.
Ümumilikdə Gəncə şəhərinə endirilən 5 raket zərbəsi (4, 5, 8, 11 və 17 oktyabr tarixlərində) nəticəsində 6-sı uşaq və yeniyetmə olmaqla 26 nəfər həyatını itirib, 29-u uşaq olmaqla 130-a yaxın insan müxtəlif dərəcəli bədən xəsarətləri alıb. Bu hadisələr zamanı 3 ailənin üzvü olan 4 uşaq hər iki valideynini itirib.
