Baş Prokurorluq media nümayəndələri və sosial şəbəkə istifadəçilərinə müraciət edib. Bu barədə 19 sentyabr tarixində Report məlumat verib.
Qurum terrorçuluğa qarşı mübarizə ilə bağlı məlumatların verilməsi qaydasını diqqətə çatdırıb.
Qeyd olunub ki, “Terrorçuluğa qarşı mübarizə haqqında” qanuna əsasən, terror əleyhinə aparılan əməliyyatlar zamanı terror aktları barəsində ictimaiyyətə məlumatlar əməliyyat qərargahının rəhbərinin və ya əməliyyat qərargahının ictimaiyyətlə əlaqələr üzrə məsul nümayəndəsinin müəyyən etdiyi formada və həcmdə verilir.
Aşağıdakı məlumatların yayılmasına yol verilmir:
- terror əleyhinə əməliyyatların aparılması taktikası və texniki üsulları haqqında;
- terror əleyhinə aparılan əməliyyatlar zonasında və ya bu zonanın hüdudlarından kənarda olan insanların həyatına və sağlamlığına təhlükə yaradan və terror əleyhinə əməliyyatların aparılmasına əngəl törədən məlumatlar haqqında;
- terrorçuluğa bəraət qazandıran və ya onların təbliğinə xidmət edən məlumatlar haqqında;
- terror əleyhinə aparılan əməliyyatlarda iştirak edən, habelə bu əməliyyatların aparılmasına kömək edən şəxslər haqqında.
Terror aktları, eləcə də terror əleyinə əməliyyatlarla bağlı yayılması qadağan edilən məlumatın internet informasiya ehtiyatında yerləşdirilməsi inzibati xəta hesab edilir və fiziki şəxslər 500 manatdan 1 000 manatadək, vəzifəli şəxslər min manatdan 1 500 manatadək məbləğdə inzibati cərimə edilir, yaxud 1 ayadək müddətə inzibati həbs tətbiq edilir, hüquqi şəxslər 1 500 manatdan 2 000 manatadək məbləğdə cərimə edilir.