Peyvənd olunmamış vətəndaşlar ASAN xidmət və ASAN kommunal mərkəzlərinin xidmətlərindən istifadə edə biləcəklər. Bu barədə 10 avqust tarixində Vətəndaşlara Xidmət və Sosial İnnovasiyalar üzrə Dövlət Agentliyi məlumat verib.
ASAN xidmət mərkəzlərinə gələn vətəndaşlardan sosial distansiya qaydalarına riayət etmək və tibbi maska taxmaq tələb olunur.
Vətəndaşlara əvvəlcədən ASAN növbə mobil tətbiqi vasitəsiylə onlayn növbə almaları tövsiyə olunur.
Daha əvvəl Əmək və Vətəndaşların Sosial Müdafiəsi Nazirliyi avqustun 16-dan etibarən peyvəndi və ya immun sertifikatı olmayan şəxslərə sosial xidmətlərin göstərilməyəcəyini bildirib. Nazirliyin və onun nəzdində olan mərkəzlərdə, habelə DOST mərkəzlərində vətəndaşların qəbulu yalnız COVİD-19 pasportu və ya müvafiq sertifikat olduğu halda mümkün olacaq.
Sentyabr ayının 1-dən etibarən isə 18 yaşdan yuxarı şəxslər yalnız COVİD-19 pasportu olduğu halda qapalı məkanlarda (iaşə, otel, böyük ticarət mərkəzləri) göstərilən xidmətlərdən istifadə edə biləcəklər.