ABŞ hərbçiləri Donald Trumpa bildiriblər ki, bu həftəsonu Irana zərbə endirməyə hazırdırlar, lakin yekun qərar hələ qəbul edilməyib
Bu barədə anonim mənbələrə istinadən “CBS News” və “CNN” məlumat yayıb.
Məlumata görə, milli təhlükəsizlik üzrə yüksək vəzifəli müşavirlər Trampa bildiriblər ki, ABŞ ordusu 21 fevral, şənbə günü İrana mümkün zərbələr endirməyə hazırdır. Tramp hələlik qərar verməyib və mənbələrin qeyd etdiyinə görə, vaxt çərçivəsi ehtimal ki, həftəsonundan sonraya da keçə bilər.
Bununla yanaşı, yaxın üç gün ərzində “United States Department of Defense” (Pentaqon) Yaxın Şərqdən hərbçiləri müvəqqəti olaraq çıxaracaq. Bildirilir ki, bu addım mümkün hərbi əməliyyatlar və ya İranın cavab zərbələri ilə əlaqədar atılır.
Mənbələrdən biri qeyd edib ki, belə qüvvə yerdəyişməsi standart təcrübədir və bu, mütləq şəkildə ABŞ-nin döyüş əməliyyatlarına hazırlaşması anlamına gəlmir.
Eyni zamanda CBS xəbər verir ki, bölgədə artıq “USS Abraham Lincoln” aviadaşıyıcı zərbə qrupu mövcuddur, ikinci aviadaşıyıcı — “USS Gerald Ford” isə Yaxın Şərqə doğru hərəkət edir.
Həmçinin CNN-in məlumatına görə, ABŞ Hərbi Hava Qüvvələri Böyük Britaniyadan Yaxın Şərqə yanacaqdaşıyan təyyarələr və qırıcılar göndərir.
Çərşənbə günü Cenevrədə ABŞ və İran arasında nüvə sazişi ilə bağlı danışıqlar keçirilib.
İranın nümayəndəsi tərəflərin “rəhbər prinsiplər toplusu” barədə razılığa gəldiyini bildirib, ABŞ rəsmisi isə “müzakirə ediləcək detallarin hələ çox olduğunu” qeyd edib, deyə CNN yazır.
