Balaxanı sakinləri illərdir davam edən yol probleminə etiraz edirlər.
İnsanoid.com-un redaksiyasına Balaxanıdan – hazırda Təbriz Xəlilbəyli küçəsi kimi adlandırılan zavod yolundan şikayət daxil olub. Sakinlərin sözlərinə görə, tullantı zavodunun yaxınlığına uzun müddətdir ki, torpaq, gil, taxta, plastik və digər məişət tullantıları traktor və yük maşınları ilə boşaldılır.
Şikayətdə bildirilir ki, əraziyə nəzarətsiz tullantı tökülməsi yalnız ekoloji narahatlıq yaratmır, həm də yolun hərəkət üçün yararsız hala düşməsinə səbəb olur.
Sakinlərin redaksiyamıza göndərdiyi müraciətdə deyilir:
“Yağış yağan kimi yol keçilməz olur. Ətrafda yığılan torpaq yağış suyunun qarşısını kəsir və yol boyunca su gölməçələri əmələ gəlir. Hər gün bu mənzərə ilə qarşılaşırıq. Yoldan keçmək həm piyada, həm də sürücülər üçün ciddi narahatlıq yaradır. Avtobus sürücüləri də şikayət edir ki, bu yol üçün "söz deyən yoxdur". Nə yerli qurumdan, nə də bələdiyyədən məsələyə reaksiya verən tapılmır".
Şikayətçilərin sözlərinə görə, problem yeni deyil – illərdir davam edir, lakin heç bir rəsmi qurum tərəfindən ölçü götürülmədiyi iddia olunur.
Sakinlər məsul qurumlara müraciət edərək, yolun təmizlənməsini, nəzarətsiz tullantı boşaltmanın qarşısının alınmasını, yağış sularının yol boyu yığılmasının qarşısını alan sistem qurulmasını tələb edirlər.
