Son zamanlar bələdiyyələr tərəfindən mənzillərə əmlak vergisinin ödənilməsi üçün xəbərdarlıqlar paylanılır. Nəzərə alaq ki, Daşınmaz Əmlakın Dövlət Reyestrindən çıxarışı olan bütün daşınmaz əmlaklar üçün illik vergi hesablanır. Adətən bunlara torpaq və əmlak vergiləri daxil edilir. Bu vergilər bələdiyyələrə ödənilir.
Bəs bu vergilərin ödənilməməsi üçün hansı istisnalar var?
Suala aydınlıq gətirən hüquqşünas Fuad Rüstəmli Bizim.Media-ya açıqlamasında bildirib ki, çıxarışı olan mənzil sahəsi üçün bələdiyyələrə hər il əmlak vergisi ödənilməlidir:
“Lakin qanunvericilikdə müəyyən istisnalar var. Məsələn Vergi Məcəlləsinin 198.1.1-ci maddəsinə əsasən, fiziki şəxslərin yaşayış sahələri vergitutma obyekti olduğu halda, yalnız 30 kvadrat metrdən artıq olan hissədən vergi tutulur. Yəni şəxsin mənzilinin 30 kvadrat metrdən az hissəsi əmlak vergisindən azaddı.
Lakin bələdiyyələr tərəfindən tələb edilən ödənişin qanuni və hüquqi əsası olmalıdır, düzgün hesablanmalı, həmçinin vətəndaşa vergi ilə bağlı əvvəlcədən bildiriş göndərilməlidir. Vətəndaşların həmin ödənişin məbləğini və qanuniliyini sorğulamaq və lazım gəldikdə buna etirazını bildirmək hüququ var”.
