Ermənistan hökumət aparatı ölkənin Rusiyadan parlament seçkilərində "rüşvət müqabilində" səs vermək üçün gələn vətəndaşlarının 25 günlük hərbi toplanışa göndəriləcəyini vəd edib.
Baş nazirin aparat rəhbərinin müavini Taron Çaxoyan iyunun 3-də özünün "Facebook" səhifəsində bununla bağlı xəbərdarlıq videosu yayımlayıb. O əlavə edib ki, imtina edənlər cinayət məsuliyyətinə cəlb olunacaqlar.
"DW" yazır ki, ölkənin iqtisadiyyat naziri və hakim "Vətəndaş müqaviləsi" partiyasının sədr müavini Gevorq Papoyan da analoji şərhə çıxış edib.
"News.аm" nəşri isə öz növbəsində iyunun 4-də yazıb ki, hərbi polis İrəvanın "Zvartnots" hava limanına gələn kişiləri yoxlayır və onlara hərbi toplanış üçün çağırış vərəqələri təqdim edir. Hərbi polisdən təsdiqləyiblər ki, onlar "hərbi mükəlləfiyyətli vətəndaşların hərbi qeydiyyata alınması, müddətli həqiqi hərbi xidmətə çağırılması və ehtiyatda olan hərbi qulluqçuların hazırlıq tədbirlərinə cəlb edilməsi prosesində hərbi komissarlıqlara köməklik göstəriblər".
"Reuters" agentliyi mayın sonlarında öz mənbələrinə istinadən xəbər verib ki, rusiyalı rəsmilər hazırda Rusiyada yaşayan Ermənistan vətəndaşlarının parlament seçkilərində hazırkı Baş nazir Nikol Paşinyanın rəqiblərinə səs vermələri üçün vətənlərinə göndərilməsi planını müzakirə ediblər. Ermənistan Baş nazirinin aparat rəhbərinin müavini videoda ehtimal edir ki, Rusiya rəsmiləri Rusiya ilə sıx əlaqələri olan biznesmen Samvel Karapetyanın xeyrinə "rüşvət müqabilində" səslər təşkil edirlər.
