The New York Times qəzetinin apardığı ilkin araşdırmaya görə, ABŞ İranda məktəbə endirilən raket zərbəsinə görə məsuliyyət daşıya bilər. Hadisə nəticəsində 160-dan çox uşaq həlak olub.
Məlumata görə, 28 fevralda İranın cənubundakı Minab şəhərində yerləşən “Şəcərəyi Təyibə” məktəbi güclü partlayış nəticəsində tamamilə dağılıb və ən azı 175 nəfər həyatını itirib, qurbanların əksəriyyəti uşaqlar olub.
Qəzetin jurnalistləri peyk görüntüləri, videolar və sosial şəbəkələrdə yayılan materialları araşdıraraq belə nəticəyə gəliblər ki, bina Tomahawk tipli Amerika raketinin dəqiq zərbəsi nəticəsində dağılıb. Hadisə yerində tapılan qalıqlarda da bu raketə aid işarələr olduğu bildirilir.
Araşdırmaya görə, ABŞ hərbçiləri zərbəni ehtimal ki, naviqasiya səhvi səbəbindən endiriblər. Mənbələr bildirib ki, ABŞ komandanlığı köhnə kəşfiyyat məlumatlarından istifadə edib və həmin bina sənədlərdə hələ də İslam İnqilabı Keşikçiləri Korpusunə aid hərbi obyekt kimi göstərilib.
Jurnalistlər müəyyən ediblər ki, 2013–2016-cı illər arasında həmin keçmiş hərbi bazanın binası məktəbə çevrilib, divarları çəhrayı və mavi rəngə boyanıb, ətrafında idman meydançaları yaradılıb. Görünür, bu məlumat ABŞ kəşfiyyatında olmayıb.
Araşdırma zamanı jurnalistlər Donald Trumpa məktəbə edilən zərbə ilə bağlı sual veriblər. O isə cavabında belə deyib: “Çünki bu barədə kifayət qədər məlumatım yoxdur”.
