"Xəzər" televiziyasının xəbər aparıcısı Ülkər Qasımzadə ölkədə dövlət xəstəxanalarında ürəyin MRT müayinəsinin aparılmamasından narazılığını ifadə edib.
Insanoid.com xəbər verir ki, aparıcı bununla bağlı sosial şəbəkə hesabında videomüraciət yayımlayıb.
Ülkər Qasımzadə bildirib ki, kardioloqun tövsiyəsi ilə ürəyin MRT müayinəsindən keçməli olub. Lakin araşdırma zamanı məlum olub ki, hazırda bu müayinə dövlət tibb müəssisələrində həyata keçirilmir.
Onun sözlərinə görə, əvvəllər bu xidmətin göstərildiyi Yeni Klinikada da artıq ürəyin MRT-si icra olunmur. Aparıcı qeyd edib ki, hazırda bu müayinə yalnız bir neçə özəl tibb müəssisəsində mümkündür və qiymətlər 300-600 manat arasında dəyişir.
Qasımzadə bu məbləğin bir çox vətəndaş üçün əlçatmaz olduğunu vurğulayaraq bildirib ki, aylıq maaşı 450-500 manat olan insanların belə bir müayinəyə vəsait ayırması olduqca çətindir. O, həmçinin həkim qəbulunun əlavə xərc yaratdığını da diqqətə çatdırıb.
Aparıcı icbari tibbi sığorta ilə bağlı da fikirlərini bölüşərək qeyd edib ki, dövlət xəstəxanalarında xidmət mövcud olmadıqda pasiyentlər özəl klinikalara yönləndirilir. Lakin onun sözlərinə görə, bu prosedur heç də asan başa gəlmir və bir sıra çətinliklərlə müşayiət olunur.
Ülkər Qasımzadə dövlət tibb müəssisələrində ürəyin MRT müayinəsinin əlçatan olmamasının narahatlıq doğurduğunu bildirib.
