Gürcüstan hüquq-mühafizə orqanları ABŞ Federal Təhqiqat Bürosu (FTB) tərəfindən beynəlxalq axtarışa verilən şəxsi Tbilisi Beynəlxalq Hava Limanında saxlayıb. Bu barədə ölkənin Daxili İşlər Nazirliyi məlumat yayıb.
Məlumata görə, saxlanılan şəxs ABŞ və Özbəkistan vətəndaşıdır və ABŞ hüquq-mühafizə orqanları tərəfindən xarici terror təşkilatına maddi dəstək vermək üçün sui-qəsd, maddi dəstək vermək və buna cəhd ittihamları ilə axtarışda olub.
Əməliyyat Gürcüstan Daxili İşlər Nazirliyinin Mərkəzi Cinayət Polisi Departamenti və Baş Prokurorluğun əməkdaşları tərəfindən ABŞ Dövlət Departamentinin nümayəndələri və FTB ilə koordinasiya şəraitində həyata keçirilib.
Nazirliyin məlumatına görə, şübhəli şəxs başqa ölkədən Gürcüstana gəldiyi zaman Tbilisi Beynəlxalq Hava Limanında saxlanılıb.
ABŞ hüquq-mühafizə orqanlarının məlumatında bildirilir ki, həmin şəxs ABŞ-də xarici terror təşkilatına dəstək məqsədilə qrup və maliyyə dəstəyi şəbəkəsi yaradıb. İddialara görə, sözügedən şəbəkə Suriyadakı terror təşkilatlarına, o cümlədən "İslam Dövləti"nə (İŞİD) maliyyə, maddi-texniki və digər dəstək göstərib.
Bundan başqa, saxlanılan şəxsin müxtəlif insanları döyüşmək məqsədilə Suriyaya getməyə təşviq etdiyi və bununla bağlı onlara kömək təklif etdiyi bildirilir.
Hazırda saxlanılan şəxsin ABŞ-yə təhvil verilməsi ilə bağlı ekstradisiya prosedurları həyata keçirilir.
