Konqo Demokratik Respublikasında təsdiqlənmiş Ebola virusuna yoluxma hallarının sayı 300-ü keçib. Səhiyyə Nazirliyinin açıqladığı son rəqəmlərə görə, bu virusdan ölənlərin sayı 48 nəfərə çatıb.
İnsanoid.com xarici mediaya istinadla xəbər verir ki, nazirliyin məlumatına görə, epidemiya yayılmağa davam edir və hazırda İturi, Şimali Kivu və Cənubi Kivu əyalətlərində 23 səhiyyə zonasına təsir göstərir. İllərdir davam edən qeyri-sabitliyin təsirində olan İturi bölgəsində təsdiqlənmiş yoluxma hallarının sayı 260-ı keçib.
Səhiyyə orqanları bildirib ki, əyalətin paytaxtı Bunia və şimal-şərqdəki Nizi şəhərində icma müqaviməti, eləcə də şayiələr və dezinformasiya virusa qarşı profilaktik tədbirləri çətinləşdirir.
Hakimiyyət orqanları bazar ertəsi günü bildirib ki, dörd xəstə sağalıb və Buniadakı tibb mərkəzindən evə buraxılıb.
