Gürcüstanın azərbaycanlıların kompakt yaşadığı Marneuli rayonunda azyaşlı nəvəsini nikaha məcbur etməkdə şübhəli bilinən qadın saxlanılıb.
Bu barədə Gürcüstanın Daxili İşlər Nazirliyi məlumat yayıb.
İstintaqın versiyasına görə, şübhəli cinsi ayrı-seçkilik və dözümsüzlük zəminində azyaşlı nəvəsini öz kəndlərindən olan bir kişi ilə iradəsinə zidd olaraq nikaha daxil olmağa məcbur edib.
Hüquq-mühafizə orqanlarının həyata keçirdiyi istintaq tədbirləri nəticəsində qadın saxlanılıb.
Faktla bağlı Gürcüstan Cinayət Məcəlləsinin 11-ci maddə ilə əlaqəli 150-ci maddəsi üzrə istintaq aparılır. Həmin maddə ilə dörd ilədək azadlıqdan məhrumetmə cəzası nəzərdə tutulur.
