Rusiyada Murmansk Arktika Universitetinin 23 yaşlı tələbəsi, etnik azərbaycanlı Rafael Məmmədov İsmət oğluna qarşı ağır hökm çıxarılıb. Məhkəmə gənci "dövlətə xəyanət" və "terror təşkilatında iştirak" maddələri ilə təqsirli bilib. Məhkəmənin qərarına əsasən, o, cəzasının ilk 3 ilini həbsxanada, qalan 12 ilini isə ciddi rejimli cəzaçəkmə müəssisəsində (koloniyada) keçirəcək.
İnsanoid.com xarici KİV-ə istinadən xəbər verir ki, bu cür ağır cinayət təqibinə səbəb Məmmədovun hazırda 340-dan bir qədər çox abunəçisi olan "Azad Laplandiya" (Свободная Лапландия) adlı "Telegram" kanalı olub. Kanalın müəllifi orada Kola yarımadasının tarixi, mədəniyyəti və mifologiyasına həsr olunmuş postlar və memlər paylaşırdı. Tarixi məzmunla yanaşı, kanalda mövcud Rusiya hakimiyyətinin tənqidi və regionun dekolonizasiyası (müstəmləkəçilikdən azad edilməsi) ehtiyacına dair mülahizələr də yer alıb.
Keçən il Rusiyanın hüquq-mühafizə orqanları və məhkəməsi bu kiçik regional resursu terrorçu platforma elan edib. Güc strukturları iddia ediblər ki, kanalın Rusiya Federasiyasında qadağan olunmuş "Post-Rusiya Azad Dövlətləri Forumu" ilə birbaşa əlaqəsi var.
Məlumata görə, Rafael Məmmədov istintaq təcridxanasında (SİZO) olduğu müddətdə iki dəfə intihara cəhd edib.
