Aktyoru Ceyms Hendi qətlə yetirilib.
İnsanoid.com xarici KİV-ə istinadən xəbər verir ki, sənətçini ögey oğlu bıçaqlayıb, daha sonra isə polisə zəng edərək bu sözləri deyib: "Mən bəşər övladıyam, indicə günah adamını öldürdüm".
Hadisə Los-Ancelesin elit rayonu olan Tarzanada baş verib. 81 yaşlı aktyor Ceyms Hendi burada sevgilisi və onun 44 yaşlı oğlu Maykl Qledhill ilə birlikdə yaşayırmış. Sənətçi ilə ögey oğlu arasında ciddi münaqişə yaranıb və Qledhill elə evin həyətindəcə Hendinin sinəsinə bir bıçaq zərbəsi vuraraq onu qətlə yetirib. Nə etdiyini anlayan şübhəli şəxs polisə zəng edərək bəyan edib: "Mən bəşər övladıyam, indicə günah adamını öldürdüm".
Hadisə yerinə gələn polis əməkdaşları Ceyms Hendini evin həyətində bıçaq xəsarəti ilə huşsuz vəziyyətdə tapıblar. Həkimlər onu yaxınlıqdakı xəstəxanaya çatdırsalar da, o, sonradan orada dünyasını dəyişib. Maykl Qledhill əvvəlcə ərazidə gəzişib, daha sonra isə polis əməkdaşlarına yaxınlaşaraq qatil olduğunu etiraf edib.
Hazırda o, saxlanılıb və hakim onun üçün 2 000 000 dollar məbləğində girov təyin edib. Qətlin dəqiq motivləri hazırda araşdırılır.
