Aprelin 21-də rusiyalı teleaparıcı Vladimir Solovyovun "Rossiya-1" kanalındakı "Polnıy Kontakt" proqramında İtaliyanın Baş naziri Corcia Meloni barəsində təqhiramiz ifadələr işlədib. Solovyov efir zamanı həm italyan, həm də rus dillərində Melonini "bəşəriyyət üçün rüsvayçılıq", "vəhşi heyvan", "tamamilə axmaq", "iyrənc kiçik qadın" və "faşist məxluq" adlandırıb. O, həmçinin Baş naziri seçicilərinə və ABŞ prezidenti Donald Trampa xəyanət etməkdə ittiham edib.
İnsanoid.com xəbər verir ki, Baş nazir Corcia Meloni baş verənlərə sosial media hesabı vasitəsilə cavab verib. O, Solovyovun təhqirlərini "karikatura" adlandıraraq rəsmi Romanın mövqeyindən dönməyəcəyini vurğulayıb. Meloni qeyd edib ki, "rejim təbliğatçılarının nə ardıcıllıq, nə də azadlıq dərsi verməyə haqqı yoxdur".O bildirib ki, bu cür hücumlar və "karikaturalar" İtaliyanın xarici siyasət kursunu dəyişməyəcək.
Bundan əlavə, İtaliya Prezidenti Sercio Mattarella da Meloniya dəstək mesajı göndərərək rusiyalı aparıcının ifadələrini "vulqar" adlandırıb və hiddətini ifadə edib.
İtaliyanın xarici işlər naziri Antonio Tajani bu ifadələri "son dərəcə ciddi və təhqiramiz" adlandırıb. O, Rusiyanın Romadakı səfiri Aleksey Paramonovu Xarici İşlər Nazirliyinə (Farnesina) çağıraraq rəsmi etiraz notasını təqdim edib. İtaliyanın müxalifət partiyaları da daxil olmaqla, müxtəlif siyasi qüvvələr bu hücumu ölkə institutlarına qarşı təhqir kimi qiymətləndirərək Meloni ilə həmrəyliklərini bildiriblər.
