Böyük Britaniyanın nüfuzlu "University of Surrey" universitetinin tələbəsi Sona Moqubəliyeva öz bənzərsiz ifaları ilə Britaniyada və sosial şəbəkələrdə geniş auditoriyanın diqqətini cəlb etməyi bacarıb. Azərbaycanın zəngin musiqi irsini beynəlxalq aləmdə təbliğ etməyi qarşısına məqsəd qoyan gənc ifaçı, hazırladığı fərqli kaver layihələri ilə xarici dinləyicilərin qəlbini fəth edir. Sona, təhsil həyatından və yaradıcılıq planlarından danışıb.
Uşaqlıqdan xaricdə təhsil almaq arzusu ilə böyüdüyünü bildirən Sona, Britaniyanın zəngin musiqi ənənələrinin və yüksək təhsil səviyyəsinin bu seçimdə həlledici rol oynadığını qeyd edir. Britaniyadakı təhsil mühitinin yaradıcılığına müsbət təsir etdiyini vurğulayan gənc artist, universitetdə öyrəndikləri ilə səhnə təcrübəsinin bir-birini mükəmməl şəkildə tamamladığını bildirir. Londonun dinamik musiqi mühiti isə ona daim yeni peşəkar zirvələrə çatmaq üçün ilham verir.
Milli köklərə bağlılığın vacibliyini önə çəkən Sona Moqubəliyevanın repertuarında həm klassik, həm də müasir Azərbaycan bəstələri yer alır. O, xüsusilə xarici tələbə yoldaşlarını muğam və klassik əsərlərimizlə tanış edərkən onların göstərdiyi heyranlığı xüsusi vurğulayır. İfaçının sözlərinə görə, xariciləri ən çox təsirləndirən və Azərbaycan musiqisinin vizit kartına çevrilən əsər "Pıçıldaşın, ləpələr" mahnısıdır. Sona hesab edir ki, bu kompozisiya dilindən və mədəniyyətindən asılı olmayaraq hər bir dinləyicinin ruhuna toxunmaq gücünə malikdir.
Gələcək planlarından danışan gənc artist, hazırda əsas diqqətini kaver layihələrinə yönəltsə də, doğru zaman yetişdikdə öz müəllif mahnılarını da dinləyicilərə təqdim edəcəyini istisna etmir. Əzizə Mustafazadə və Billi Ayliş (Billie Eilish) kimi sənətkarlarla eyni səhnəni bölüşməyi arzulayan Sona, xaricdə yaşayan gənc bir azərbaycanlı kimi üzərində böyük məsuliyyət hiss etdiyini və ölkəmizin mədəniyyətini layiqincə təmsil etməyə davam edəcəyini vurğulayır.
Mənbə: 1news.az
