Azərbaycanın Xalq artisti Aygün Kazımova məktəblərdə vahid geyim forması və hicabla bağlı son günlər gündəmdə olan müzakirələrə münasibət bildirib.
İnsanoid.com xəbər verir ki, müğənni "Instagram" hesabında paylaşım edərək məktəbli forması ilə bağlı qaydaların dini inanclara qarşı addım kimi təqdim olunmasını düzgün hesab etmədiyini vurğulayıb.
"Azərbaycan dünyəvi dövlətdir və ölkəmizdə hər kəsin inancına, düşüncəsinə hörmətlə yanaşılır. Eyni zamanda, dövlətimizin qanunlarına və müəyyən edilmiş qaydalara riayət etmək hər birimizin vətəndaş borcudur", – deyə sənətçi bildirib.
Xalq artisti bu məsələ ətrafında cəmiyyətdə qarşıdurma yaradılmasının yolverilməz olduğunu qeyd edib.
"Məktəblərdə vahid geyim qaydalarını dini inanclara qarşı addım kimi təqdim etmək, bu məsələ üzərindən cəmiyyətdə qarşıdurma yaratmaq yolverilməzdir. Uşaqlarımızın təhsili heç bir siyasi marağın və təxribatın vasitəsinə çevrilməməlidir", – deyə Kazımova vurğulayıb.
Müğənni Vətən müharibəsi zamanı Azərbaycan xalqının nümayiş etdirdiyi həmrəyliyi xatırladaraq cəmiyyəti birliyi qorumağa çağırıb.
"Uşaqlarımıza verəcəyimiz sağlam gələcək, dövlətimizin bütövlüyü və birliyimizlə nümunə olaq", – deyə Aygün Kazımova paylaşımını yekunlaşdırıb.
