Səudiyyə Ərəbistanı hakimiyyəti müsəlmanlar üçün müqəddəs Məkkə şəhərindəki məsciddə "qeyri-əxlaqi hərəkətlər" etməkdə təqsirləndirilən Banqladeş vətəndaşı olan iki nəfər — bir kişi və bir qadın barəsində çıxarılmış ölüm hökmünü icra edib.
İnsanoid.com xarici KİV-ə istinadən xəbər verir ki, Banqladeş tərəfi öz vətəndaşlarının edam edilməsi barədə məlumatlandırılmadığını bildirib və ətraflı məlumatın təqdim olunması üçün Səudiyyə Ərəbistanı hakimiyyətinə müraciət edib.
Səudiyyə Ərəbistanı Daxili İşlər Nazirliyinin məlumatına görə, edam çərşənbə günü ali məhkəmə instansiyası ölüm hökmlərini təsdiqlədikdən və Kral fərmanı onların icrasına icazə verdikdən sonra baş tutub.
Səudiyyə qurumu izah edib ki, bu qərar müqəddəs məkanın və vaxtın toxunulmazlığını pozan "məhkumların əməllərinin ağırlığı və ciddiliyi" nəzərə alınaraq qəbul edilib. Bununla belə, iddia olunan hüquqpozmanın təfərrüatları açıqlanmayıb.
Banqladeş Xarici İşlər Nazirliyinin nümayəndəsi Şama Obayd bildirib ki, qurum Səudiyyə tərəfinə baş vermiş hadisənin təfərrüatları barədə ətraflı məlumatın verilməsi tələbi ilə rəsmi sorğu göndərib.
