Аbu-Dabi kral ailəsinin üzvü, şahzadə Mahra əl-Nəhayyan Böyük Britaniyanın paytaxtı Londonda sərxoş və huşsuz vəziyyətdə aşkar edilib.
İnsanoid.com xarici KİV-ə istinadən xəbər verir ki, yay aylarında şahzadə bir neçə gün ard-arda kokain qəbul edərək huşunu itirib. O, evin yaxınlığında, səpələnmiş əşyalarının və çamadanının yanında çılpaq ayaqla oturarkən görüntülənib. Həmin vaxt onun 3 yaşlı övladı nəzarətsiz qalaraq nəqliyyatın sıx olduğu hərəkət hissəsinə tərəf qaçıb.
Hadisə ilə bağlı oktyabrın 13-də məhkəmə qərarı çıxarılıb. Mahra əl-Nəhayyan övladına lazımi səviyyədə nəzarət etmədiyinə görə təqsirli bilinib. Məhkəmənin hökmü ilə ona məcburi reabilitasiya keçmək şərtilə iki il müddətinə nəzarət təyin olunub və 6 min funt sterlinq (təxminən 13 500 manat) məbləğində cərimə kəsilib.
Qeyd edək ki, Abu-Dabinin hakim sülaləsinin varidatı 250 milyard funt sterlinqdən çox qiymətləndirilir. Ailə həyatı qurduqdan sonra "şahzadə" titulu alan Mahraya şəxsi xərcləri üçün hər ay 8 min funt sterlinq məbləğində vəsait ayrılır.
