Azərbaycan əsilli türkiyəli aktrisa sosial şəbəkələrdə ünvanına səslənən ittihamlardan sonra açıqlama yayaraq onu təhqir edən şəxslərə qarşı hüquqi addımlar atacağını bildirib.
Tanınmış Azərbaycan əsilli türkiyəli aktrisa Nəsrin Cavadzadə sosial şəbəkələrdə ona qarşı səsləndirilən tənqid və ittihamlara münasibət bildirib.
İnsanoid.com xəbər verir ki, buna səbəb aktrisanın Azərbaycanda məktəbli formasına dair qaydalarla bağlı müzakirələr fonunda yayımlanan paylaşımlardan birinə verdiyi reaksiya olub.
Bakıda anadan olan Nəsrin Cavadzadə sözügedən paylaşıma üç emoci — alov, Azərbaycan bayrağı və qırmızı ürəklə (🔥🇦🇿❤️) münasibət bildirib.
Lakin bəzi sosial şəbəkə istifadəçiləri aktrisanın bu reaksiyasını fərqli şəkildə şərh edərək onu tənqid ediblər. Cavadzadənin sözlərinə görə, onun ünvanına əsassız ittihamlar və təhqirlər də səsləndirilib.
Bundan sonra aktrisa sosial şəbəkə hesabında geniş açıqlama yayımlayaraq baş verənlərə münasibət bildirib.
"Heç kimin mənim türklüyümü, müsəlmanlığımı və ya inanclara olan hörmətimi sorğulamağa həddi yoxdur", — deyə Cavadzadə vurğulayıb.
O bildirib ki, sadəcə bir paylaşımı bəyənməsinə əsaslanaraq ona aid olmayan fikirlərin adına çıxarılmasını qəbul etmir.
Aktrisanın sözlərinə görə, şəxsiyyətinə yönəlmiş təhqirlərlə bağlı sübutlar artıq toplanaraq hüquqi qiymət verilməsi üçün vəkillərinə təqdim olunub.
"Buna görə məsuliyyət daşıyan şəxslərlə Türkiyə məhkəməsində hesablaşacağam", — deyə o xəbərdarlıq edib.
Cavadzadə həmçinin məhkəmə proseslərinin nəticəsində təyin olunacaq və tahsil ediləcək bütün təzminatları uşaqların təhsilinə dəstək məqsədilə xeyriyyə təşkilatlarına bağışlayacağını açıqlayıb.
Aktrisa müraciətinin sonunda milli kimliyi, dini inancı və dəyərləri üzərindən aparılan heç bir nüfuzdan salma cəhdinə boyun əyməyəcəyini vurğulayıb.
