Azərbaycanın qaydasız döyüş idmanı üzrə ən tanınmış idmançısı, Mütləq Döyüş Çempionatının (UFC) turnirlərinin iştirakçısı Tofiq Musayev, bu il Bakıda keçirilən turnirdə qırğızıstanlı Mıktıbek Orolbaya məğlubiyyətdən sonra media gündəmindən qəfil itib.
İdman.biz hazırda Tailandda olan məşhur idmançı Tofiq Musayev ilə əlaqə saxlayaraq ondan qısa, lakin maraqlı bir müsahibə götürüb.
- Tofiq bəy, hazırda Tailandda nə ilə məşğulsunuz?
-Həyatım boyu nə ilə məşğul olmuşamsa, indi də onunla – məşqlərlə və növbəti döyüşə hazırlıqla.
- Niyə məhz Tailand, yoxsa Azərbaycanda hazırlıq keçmək mümkün deyil?
- Mən tay boksu və qreplinq döyüş növü üzrə bacarıqlarımı mükəmməlləşdirmək istəyirdim, buna görə də demək olar ki, bir aydır buradayam. Dünyada bu növlər üzrə ən yaxşı sparrinq-rəqibləri harada tapmaq olar? Əlbəttə, Tailandda.
- Yaxın planlarınız nədən ibarətdir?
- Dekabr ayında UFC-də döyüşüm gözlənilir. Hazırda təşkilat mənə uyğun rəqib axtarır. Ona görə də buradan birbaşa ABŞ-yə yollanacağam və hazırlığımı orada, yəni hadisələrin mərkəzinə daha yaxın yerdə davam etdirəcəyəm.
- Bakıda aldığınız məğlubiyyət rəqib seçiminə təsir edəcəkmi? Yəni indi sizə daha zəif bir rəqib təyin edə bilərlərmi?
- Əlbəttə, yox! Necə ola bilər ki, 28 döyüşün 22-sində qalib gəlmiş bir idmançıya zəif rəqib seçsinlər? Əminəm ki, rəqibimin adı açıqlananda hamı görəcək - o, heç də zəif deyil və səviyyə baxımından ən azı Orolbaydan geri qalmır. Mən isə artıq öz 23-cü qələbəmə hazırlaşıram.
