Korean Herald nəşrinin yazdığına görə, Koreya Respublikasında 45 abituriyent məktəbdə bullinqdə iştirak etdiklərinə görə universitetlərə qəbul ola bilməyib. Cənubi Koreya universitetləri artıq abituriyentlərin məktəb dövründə bullinqdə iştirakını ali məktəblərə qəbul zamanı nəzərə almağa başlayıblar.
İnsanoid.com xarici KİV-ə istinadən xəbər verir ki, bu il artıq 45 nəfər məktəbdə yol verilmiş uyğun olmayan davranışlara görə ali məktəblərə qəbuldan kənarlaşdırılıb. Onların ərizələri ölkənin ən nüfuzlu universitetlərindən olan Seul Milli Universiteti və Kyonqbuk Universiteti tərəfindən rədd edilib. Sonuncuda intizamın qiymətləndirilməsi üçün sərt sistem tətbiq olunub: qayda pozanlara törətdikləri əməllərin ağırlıq dərəcəsinə uyğun olaraq cərimə balları verilir.
Gələn ildən etibarən ölkənin bütün universitetləri abituriyentlərin məktəbdə zorakılıqda iştirakına dair məlumatları qəbul zamanı nəzərə almağa məcbur olacaq. Həmçinin 10 dövlət pedaqoji universiteti elan edib ki, gələn ildən məktəbdə istənilən səviyyədə zorakılıq törətmiş abituriyentlər avtomatik olaraq qəbul imkanından məhrum ediləcək.
