Bakının Nizami rayonunda yerləşən “8-ci km Bazarı” kimi tanınan “Vüqar-2” ticarət mərkəzində yanğın təhlükəsizliyi sahəsində nöqsanlar aşkarlanıb. Bu barədə noyabrın 12-də Fövqəladə Hallar Nazirliyi məlumat yayıb.
Belə ki:
- ticarət mərkəzi yanğın su hovuzu ilə təmin edilməyib, habelə ərazidə daxili yanğın su kranları quraşdırılmayıb;
- obyektin elektrik təsərrüfatına və qurğularına profilaktik baxış keçirilməyib və nöqsanların aradan qaldırılması istiqamətində müvafiq tədbirlər görülməyib;
- obyektdə standarta uyğun olmayan elektrik qızdırıcı cihazlarından istifadə edilir;
- bir çox satış sahələrinin divarları və tavanı tezalışan çadır tipli materiallarla örtülüb;
- ticarət mərkəzi ilkin yanğınsöndürmə vasitələri ilə təmin edilməyib;
- piştaxtalar olan cərgələrdə, habelə ərazidə saxlanılan avtomobillər arasında ara məsafəsi gözlənilməyib və təxliyə yollarında sərbəst hərəkət məhdudlaşdırılıb;
- ticarət mərkəzinin perimetri boyunca vətəndaşların küçə ticarəti ilə məşğul olması səbəbindən yanğın avtomobillərinin ticarət mərkəzinə yaxınlaşması məhdudlaşdırılıb.
Eyni zamanda obyektin ərazisində qanunsuz fəaliyyət göstərən motel və orada ciddi qayda pozuntularının olması məlum olub.
Nəticədə ticarət mərkəzinin yanğın təhlükəsizliyinə qarşı cavabdeh şəxsi – Həsrətov Həsrət Tənzil oğlu barəsində inzibati protokol tərtib edilib.
