Göyçayda bacısı qızını boğaraq öldürməkdə təqsirləndirilən şəxsin apellyasiya şikayəti üzrə qərar elan edilib. Bu barədə 11 noyabr tarixində Report məlumat verib.
Vüqar Bədəlov barəsində olan hökmdən verilən apellyasiya şikayəti üzrə qərarı Şəki Apellyasiya Məhkəməsi elan edib.
Hakim İmanverdi Şükürovun sədrliyi ilə keçirilən prosesdə birinci instansiya məhkəməsinin çıxardığı hökm dəyişdirilmədən saxlanılıb.
2021-ci il mayın 9-u saat 06 radələrində Göyçay rayonunun Bığır kəndi ərazisində kənd sakini, 19 yaşlı Fatimə Məmmədova dayısı V.Bədəlov tərəfindən yastıqla boğularaq qətlə yetirilib.
İttihama görə, dayı bacısı qızını namus üstə öldürüb. Belə ki, F.Məmmədova nişanlı olub. Lakin o, sonradan nişanlı ola-ola evdən qaçıb və yenidən evə qayıdıb.
Hadisə günü F.Məmmədova evdə ayrı-ayrı şəxslərlə uca səslə telefonla danışıb. V.Bədəlov da qadının bu hərəkətlərinə irad bildirib. Bacısı qızı isə onu nalayiq ifadələrlə təhqir edib və dayısına əhəmiyyət vermədən yenidən telefonla danışmağa başlayıb.
Daha sonra V.Bədəlov F.Məmmədova yatan zaman onu yastıqla boğaraq öldürüb.
Xatırladaq ki, V.Bədəlov ifadəsində F.Məmmədovanın TikTok sosial şəbəkələrində bir çox videogörüntülərinin yayıldığını da deyib.
Şəki Ağır Cinayətlər Məhkəməsinin hökmü ilə o, 14 il 6 ay müddətinə azadlıqdan məhrum edilib.
