İran xüsusi xidmət orqanlarının yaratdığı casus şəbəkəsi ifşa edilib. Bu barədə 14 noyabr tarixində Dövlət Təhlükəsizliyi Xidməti məlumat verib.
Zahir Əsgərov Xəzər Dəniz Neft Donanmasında gəmi kapitanı vəzifəsində işləyib. O, İranın Qum şəhərində dini təhsil aldığı müddətdə maddi maraq müqabilində adıçəkilən ölkənin xüsusi xidmət orqanı nümayəndələri tərəfindən məxfi əməkdaşlığa cəlb edilib. O, neft platformalarına daşınan yüklər barədə topladığı məlumatları mobil telefon vasitəsilə təqdim etməklə casusluq formasında dövlətə xəyanət etmişdir.
Rəsulov Elnur 2018-ci ildən İranda özünü “Meyse” və “Doktor” adları altında təqdim edən bu ölkənin xüsusi xidmət orqanı nümayəndələri ilə əməkdaşlıq edirdi.
Rəsulov Arif qohumu olan Rəsulov Elnura məlumatın toplanmasında köməklik edirdi.
Ağazadə Bəxtiyar dini təhsil almaq üçün İran İslam Respublikasında olarkən orada həmin ölkənin xüsusi xidmət orqanının nümayəndələri ilə maddi maraq müqabilində məxfi əməkdaşlığa başlamışdır.
Cəfərzadə Mirhafiz İran xüsusi xidmət orqanlarının nəzarəti altında törətdiyi cinayət əməllərinə görə 2018-ci ildən barəsində məhkəmə qərarı ilə həbs qətimkan tədbiri seçilməklə beynəlxalq axtarışa verilmişdir. O, İranda gizlənən Məmmədov Orxan Kəmran oğlunun Azərbaycanın təhlükəsizliyi və müdafiə qabiliyyətinin zərərinə verdiyi tapşırıqlarını yerinə yetirərək hərbi təyinatlı obyektlərin yerləşdiyi əraziləri dəqiqləşdirməklə onların lokasiyasını və digər məlumatları “Telegram” tətbiqi sistemi vasitəsilə sonuncuya göndərib.
Belə ki, Azərbaycan Respublikasının vətəndaşları Zahir Əsgərov, Elnur Rəsulov, Arif Rəsulov, Mirhafiz Cəfərzadə və Bəxtiyar Ağazadə “dövlətə xəyanət” maddəsi ilə cinayət məsuliyyətinə cəlb edilərək həbs olunublar.
Araşdırmalar zamanı İran xüsusi xidmət orqanının tapşırığı əsasında fəaliyyət göstərən, barələrində olan cinayət işləri üzrə məsuliyyətdən yayınaraq İranda gizlənən Tohid İbrahimbəyli, Orxan Məmmədov, Elşad Hacıyev və digərləri tərəfindən təsir dairəsində saxlanılan Azərbaycan vətəndaşlarının üzv kimi cəlb edildiyi “Müzakirələr”, “Elanlar” və digər adlar altında “WhatsApp” tətbiqində yaradılmış qapalı qruplar ifşa edilmişdir.
