Fransanın prezidenti Emmanuel Makronun bəyanatı Avropanın Azərbaycan və Ermənistan arasında uzunmüddətli sülhün əldə edilməsi üçün vasitəçilik səylərinə kölgə salır. Bu barədə Fransanın “Causeur” xəbər jurnalında deyilir.
Bildirilib ki, bu bəyanat Fransanın vasitəçi rolunu təhlükə altına ata və münaqişədə Rusiyanın təsirini artıra bilər.
“İlham Əliyev və Nikol Paşinyan arasında bir sıra üçtərəfli görüşlər Avropa İttifaqının prezidenti Şarl Mişel tərəfindən təşkil olunub. Azərbaycanda Fransanın ermənilərin tərəfində olması haqda geniş fikir formalaşsa da, Emmanuel Makron bu danışıqların bəzilərində vasitəçi kimi iştirak edib”, - deyə məqalədə qeyd edilib.
Praqadakı son görüşdə əldə edilən razılıqların sülhə ümid verdiyi vurğulanıb. Bir neçə gün sonra isə Fransa başçısı bəyanatında açıq şəkildə erməniləri müdafiə edib: “Ermənistan həmişə bu regionda tolerantlıq və sülh üçün mübarizə aparıb. Qarabağ bu ölkənin ürəyindədir”.
Məqalədə bunun Fransanın Ermənistan-Azərbaycan sabitləşmə prosesində qərəzsiz vasitəçi roluna xələl gətirdiyi və Cənubi Qafqazdakı mövqelərinə siyasi zərbə vurduğu diqqətə çatdırılıb.
