Şəkidə köhnə doğum evinin ərazisindən körpə uşaq sümükləri aşkarlanıb. Bu barədə 11 noyabr tarixində Arxeologiya, Etnoqrafiya və Antropologiya İnstitutu məlumat verib.
Belə ki, Şəki şəhər “Yuxarı Baş” Milli Tarix- Memarlıq qoruğu ərazisində yerləşən, hazırda “şəbəkə sexi” kimi fəaliyyət göstərən tarixi abidədə Dövlət Turizm Agentliyi tərəfindən aparılan bərpa-quruculuq işləri zamanı binanın daxilində beton döşəmə təmir edilərkən 80-120 sm dərinlikdə azyaşlı insanlara aid skeletlər aşkar edilib.
Sonra binanın ətrafında qazılmış yerlərə baxış keçirilib. Ətrafda heç bir maddi mədəniyyət nümunələrinə rast gəlinməyib. Bir-iki yerdə saxsıdan hazırlanmış su tüngləri aşkarlanıb. Binanın şimal-qərb hissəsində, çöl tərəfdən divarın altında arka tipli çıxış qeydə alınıb.
Döşəmə sökülərkən betonun alt hissəsində kül qatı və yanmış insan sümükləri aşkarlanıb. “İnsan qalıqları, əsasən, körpə uşağa aid sümüklərdən ibarətdir. Belə görünür ki, burada, həmçinin kremasiya (ölüyandırma) işləri də aparılıb. Bu yerin yaxın zamanlaradək doğum evi olduğu söylənilir. Ehtimal olunur ki, doğuş vaxtı və ya bir müddət sonra xəstəlikdən, digər səbəblərdən tələf olan uşaqlar burada yuyulub dəfn olunublar”.
Qeyd olunub ki, yerli əhalinin bildirdiyinə görə, bina uzun müddət – sovetlər dövründə “ölüxana” kimi fəaliyyət göstərib.
