Belə bir deyim var: “Sözü ağzında bişir, sonra çıxar”. Çox təəssüf ki, Azərbaycanın müxtəlif kütləvi informasiya vasitələrinin redaktorları bu fikrə əməl etmirlər. Yaxud da ki onlar öz oxucularına hörmət etmirlər, sırf nə isə paylaşmaq xatirinə yazırlar.
Biz, ölkəmizin fərqli şəhərlərindən olan 10 nəfər həmvətənimiz tərəfindən hazırlanmış, Fransa Senatına yönəlmiş, artıq 36 mindən çox səs toplamış, sədası bütün Azərbaycana yayılmış və artıq Avropaya, Türkiyəyə, İsrailə yayılan petisiya mövzusu haqqında danışırıq!
Bu mövzunun yayılması üçün köməklik göstərmək qərarına gələn ilk biz olduğumuz üçün qürur duyuruq, lakin tamamilə fərq etmir, kim birinci idi, kim ikinci, kim isə 30-cu. Əsas odur ki, biz hamımız bir xalq olaraq, birlikdə işləyirik.
Vacib olanı odur ki, azərbaycanlılara müraciət edən mətbuat redaktorları səhf məlumat verməsinlər. Petisiyanı təşkil edən FRANSA VƏ YA DİGƏR XARİCİ ÖLKƏDƏ YAŞAYANLAR DEYİL, bizik – burada yaşayan azərbaycanlılardır. Bunu Türkiyədəki, İsraildəki jurnalistlər başa düşdü, lakin bizdə bəzilərinə düzgün çatmadı.
Əgər yazdığın mövzuya bir balaca diqqət yetirsən, petisiyanın altında bütün təşəbbüskarların adlarını və yaşadıqları şəhərləri tapmaq olar.
“Həmkarlar”, sizcə, Gəncə, Lənkəran, Bakı, Sabirabad – Fransadakı şəhərlərdir? Yoxsa Sumqayıt Lion ilə Marsel arasında yerləşir?
İstəmədən belə bir sual yaranır, siz ancaq petisiya mövzusunda, ya elə başqa mövzularda da belə yanlışlığa yol verirsiniz? Xahiş edirik, öz oxucularınıza hörmət edin, diqqətli olun, xüsusilə də əgər mövzu hər birimizə aiddirsə.
