Xəbər verdiyimiz kimi, Dubaydan Tel-Əvivə uçan "Flydubai" aviaşirkətinə məxsus "Boeing 737" sərnişin təyyarəsində faciəvi qəzanın qarşısı son anda alınıb. Uçuş zamanı Oman əsilli ikinci pilot radikal dini baxışları zəminində intihar etmək məqsədilə gəmi kapitanı Smit Maçhara bıçaqla hücum edib. Hücum nəticəsində idarəetməni itirən hava gəmisi 30 saniyədən az müddətdə 14 min fut (təxminən 4 200 metr) hündürlük itirərək sürətlə yerə doğru enməyə başlayıb.
İnsanoid.com xarici KİV-ə istinadən xəbər verir ki, ağır xəsarətlər almasına və kəskin qanaxmaya baxmayaraq, hindistanlı kapitan Maçhar son gücünü toplayaraq kabinənin qapısını açmağı bacarıb. Xəstəxanadan Hindistanın Baş naziri Narendra Modiyə baş verənləri söyləyən qəhrəman pilot bildirib ki, yerdə qan içində uzanarkən təyyarənin düşdüyünü hiss edib və qapını açmasa hər kəsin həlak olacağını anlayaraq son anda ayağa qalxa bilib.
Qapının açıldığını görən sərnişinlər və qeyri-xidməti vəzifədə olan pilotlar dərhal içəri daxil olaraq terrorçunu zərərsizləşdiriblər. Hadisə şahidlərindən biri, göyərtədə olan həkim-stomatoloq Musayev qeyd edib ki, 4 nəfər hücum edəni kabinədən çıxararaq əl-ayağını bağlayıb, bu zaman terrorçu yalnız "Məni öldürün" deyə yalvarıb. Sərnişinlərin və kapitanın çevikliyi sayəsində təyyarə Səudiyyə Ərəbistanının Tabuk şəhərindəki aviabazaya təcili eniş edib.
İsrailin Baş naziri Benyamin Netanyahu terrorçunun radikal islamçı təsirlərə məruz qaldığını və təyyarəni qəsdən qəzaya uğratmaq istədiyini bildirib. Mütəxəssislər kapitanın bu addımı ilə ikinci "11 Sentyabr" dəhşətinin qarşısını aldığını vurğulayıblar. Hazırda BƏƏ, Səudiyyə Ərəbistanı və İsrail kəşfiyyat orqanları tərəfindən hadisə ilə bağlı genişmiqyaslı araşdırma aparılır.
