Gənc qız komada olduğu müddətdə 7 ilini başqa bir reallıqda keçirib.
İnsanoid.com xarici KİV-ə istinadən xəbər verir ki, 19 yaşlı fransız Kleliya Verdye canına qəsd etməyə cəhd göstərib. Onu xilas etmək və vəziyyətini stabilləşdirmək üçün həkimlər Kleliyanı süni koma vəziyyətinə salmalı olublar. O, təxminən üç həftə huşsuz qalıb.
Özünə gələn kimi verdiyi ilk sual bu olub: "Uşaqlarım haradadır?". Həkimlər onun uşağının olmadığını və bütün bu müddət ərzində reanimasiyada huşsuz vəziyyətdə yatdığını izah ediblər.
Lakin Kleliya üçün 3 həftə deyil, sanki 7 illik real həyat keçib. Bu müddət ərzində o, bir gənclə tanış olub, ailə qurub və üç övlad dünyaya gətirib.
Onun dediyinə görə, doğuş prosesi 100% real hiss olunub. Qorxu, ağrı, panika, yorğunluq — hər şey real həyatdakı kimi imiş.
O, hətta övladlarından birini itirib və bu, onun üçün böyük bir travmaya çevrilib. Kleliya daxilindəki dəhşətli günahkarlıq hissini, kədəri və boşluğu çox aydın xatırlayırdı. Digər iki övladı isə onunla qalıb.
O, uşaqların xarakterini, vərdişlərini, necə gəzdiklərini, söhbətlərini və axşamları necə keçirdiklərini xatırlayırdı. Onları bütün qəlbi ilə sevirdi. Ona həqiqətən elə gəlirdi ki, bütün bu illəri onlarla keçirib. Beyni bütöv bir bioqrafiya uydurmuşdu: uşaqların böyüməsi, ailə məişəti və bütün duyğular.
O dünya o qədər real idi ki, komadan sonra bunun saxta olduğunu anlamaq onun üçün uzun çəkib. Yeddi illik ömür bir neçə saniyəyə yoxa çıxıb. Ən ağırı isə odur ki, xatirələr heç yana getməyib. Beyni ilə bunun sadəcə hallüsinasiya olduğunu anlasa da, o, hələ də uşaqları üçün darıxırdı.
Həkimlər bildirirlər ki, süni koma zamanı beyin tamamilə sönmür. İnsan şüur qırıntılarını — dərin yuxu, hallüsinasiyalar və huşun dumanlanmasının qarışığını hiss edə bilər. Buna görə də zaman uzanır, yuxular hədsiz real görünür, emosiyalar isə yaddaşda həqiqi kimi qalır.
Hazırda onunla psixoloqlar məşğul olur — o xatirələri reallıqdan ayırmaq onun üçün hələ də çətindir.
