Əvvəlcə həqiqətən 4,4 bal gücündə zəlzələnin olduğu bildirilib. Lakin son məlumatlara görə, hər şeyin zəlzələdən deyil, nəhəng bir buzlaqın çökməsi ilə başladığı ehtimal edilir.
İnsanoid.com xarici KİV-ə istinadən xəbər verir ki, hazırda mənzərə belədir - Təxminən 5200 metr hündürlükdə buzlağın aşağı hissəsi qopub.
Nəhəng bir buz, qaya və torpaq kütləsi təxminən 1200 metr dərinlikdə olan Lhende Khola çayı vadisinə çöküb.
Uçqun bir müddət çayın məcrasını kəsərək təbii bənd yaradıb.
Daha sonra toplanan su bəndi yararaq keçib — aşağıya doğru nəhəng su, palçıq və qaya parçaları axmağa başlayıb.
Bu dalğa Lhende-Khola çayından Bhote-Koshiyə, daha sonra isə Trisuli çayına keçib. Bəzi ərazilərdə suyun səviyyəsi cəmi yarım saat ərzində təxminən doqquz metr qalxıb. Bu, adi, tədricən baş verən daşqın deyil, qəfil sel idi.
Zəlzələyə gəlincə: ABŞ Geoloji Xidməti əvvəlcə 4,4 bal gücündə zəlzələ qeydə alsa da, sonra məlumatlarını yenidən nəzərdən keçirib: seysmik alətlər, ehtimal ki, zəlzələni deyil, nəhəng çökmənin özünü qeydə alıb - onun siqnalı təxminən 5,2 bal gücündə bir hadisəyə uyğun gəlirdi. Yəni hazırda ən ehtimal olunan nəticə belədir: uçquna zəlzələ səbəb olmayıb, əksinə, uçqunun özü ilk olaraq zəlzələ kimi qəbul edilib.
Buzlağın niyə qopduğu hələ ki tam müəyyən edilməyib. Peyk görüntüləri fəlakətdən əvvəl qarın intensiv əriməsini göstərir; qeyri-adi isti hava, buzlaqların zəifləməsi və Himalay dağlarında uzunmüddətli istiləşmə şübhəli amillərdir. Lakin dəqiq səbəbin müəyyən edildiyini iddia etmək hələ tezdir. Bu, həmçinin klassik buzlaq gölünün partlaması hadisəsinə bənzəmir. Əsas versiya indi çayın qarşısını kəsən buzlu qaya uçqunu hesab olunur.
