Qızını motosiklet qəzasında itirən tanınmış vəkil Fərhad Mehdiyev öz acısını və təcrübəsini sosial şəbəkədə yazmaqla ifadə edib.
"Sizə pis ata, lap abyuser desinlər; səbrlə uşaqlarınızı 23-25 yaşına qədər yönləndirməyə, nəzarət etməyə davam edin. Siz onlara "öz həyatım var, işlərim çoxdur" deyib nəzarət etməsəniz, bir gün peşmanlığınızın, ağrılarınızın və mənəvi əzablarınızın qarşısını ala bilməyəcəksiniz"- bu sözlər isə onun fikrinin əsas qayəsi olub.
İnsanoid.com-un məlumatına əsasən, atanın gəldiyi ən mühüm qənaət isə budur ki, uşağın hər istədiyi həyatı deyil, valideynin onun üçün seçdiyi doğru və sınaqdan keçmiş yolu ona təqdim etmək lazımdır. Sevgi, qayğı və nəzarətin tərbiyənin əsas sütunları olduğunu deyən müəllif, müraciətini bu təsirli sözlərlə tamamlayıb:
"Həyatda ən böyük investisiya uşaqlarınızdır. O məsələdə udsanız, digər heç bir şeydə udmasanız belə, sizə qəm yoxdur. Övlad məsələsində uduzan valideynin isə əslində heç bir qazancı və təsəllisi yoxdur".
