29 aprel 2026-cı il tarixində "Sülh Körpüsü" Təşəbbüsü çərçivəsində aparıcı media nümayəndələri ilə növbəti görüş keçirilib.
İnsanoid.com xəbər verir ki, Təşəbbüs iştirakçılarının qatıldığı görüşdə Cənubi Qafqaz Tədqiqatlar Mərkəzinin direktoru və "Sülh Körpüsü" Təşəbbüsünün koordinatoru Fərhad Məmmədov giriş nitqi ilə çıxış edərək platformanın məqsədləri və fəaliyyəti barədə ətraflı məlumat verib.
Tədbirdə qeyd olunub ki, Ermənistanda yaxın vaxtlarda keçiriləcək parlament seçkilərinə qədərki mərhələ bu ölkə ilə aparılan danışıqlarda xüsusi əhəmiyyət kəsb edir. Cəmiyyətdə sülh məsələsinə dair müxtəlif yanaşmalar mövcuddur və bu kontekstdə parlament seçkiləri həm prosesin gələcəyini müəyyən etmək, həm də ictimai hazırlıq səviyyəsini qiymətləndirmək baxımından vacibdir.
Vurğulanıb ki, "Sülh Körpüsü" çərçivəsində fəaliyyət heç bir xarici maliyyələşmə olmadan həyata keçirilir və bu, Azərbaycan tərəfinin prinsipial mövqeyidir.
Sülh prosesində medianın mühüm rolu xüsusi diqqət mərkəzində olub. İştirakçılar qeyd ediblər ki, informasiya məkanında təxribat xarakterli materialların qarşısını almaq üçün əlavə tədbirlər görülməlidir. Media mühitinin özünəməxsus xüsusiyyətləri var və bu sahədə müəyyən çətinliklər mövcuddur. Həmçinin informasiya resurslarında terminoloji yanaşmanın unifikasiyası (eyniləşdirilməsi) məsələləri müzakirə edilib.
Tədbirdə iştirak edən media nümayəndələri bildiriblər ki, televiziya və digər platformalarda birgə layihələrin icrası sülh prosesinə töhfə verə bilər. Qeyd olunub ki, telekörpülərin təşkili, diskussiya proqramlarının hazırlanması və ekspert mübadiləsi bu istiqamətdə effektiv vasitələr ola bilər.
Bundan əlavə, Ermənistan və Azərbaycan mediası arasında birbaşa əlaqələrin qurulmasının vacibliyi, eləcə də informasiya məkanında nifrət nitqindən çəkinməyin zəruriliyi vurğulanıb.
Sonda qeyd edilib ki, qarşılıqlı gözləntilərin düzgün müəyyənləşdirilməsi və cəmiyyətin bu prosesə marağının artırılması üçün media daha fəal rol oynamalıdır.
