Çin Xalq Respublikasının Sədri Si Cinpin 8 may tarixində Rusiya Prezidenti Vladimir Putinlə görüşündə onu Ukrayna ilə “ədalətli, davamlı və hüquqi cəhətdən məcburi” sülh sazişi bağlamağa çağırıb.
“Bloomberg” bildiri ki, Çin sədri ilk dəfə şəxsən Putinə müharibənin necə başa çata biləcəyinə dair prinsiplərini izah edib.
Kremldə təşkil olunan çay süfrəsi zamanı tərəflər Ukraynadakı müharibə ilə bağlı fikirlərini bölüşüblər. Çin sədrinin sözlərinə görə, “bütün ölkələrin təhlükəsizlik sahəsindəki qanuni narahatlıqları nəzərə alınmalı və Ukraynadakı böhranın əsas səbəbləri aradan qaldırılmalıdır”.
Si Cinpin bildirib ki, Çin sülhə nail olmaq üçün bütün səyləri alqışlayır.
Putin isə cavab olaraq Rusiyanın heç bir ilkin şərt olmadan sülh danışıqlarına başlamağa hazır olduğunu və ədalətli sülh sazişinin əldə ediləcəyinə ümid etdiyini bildirib.
