Türkiyənin məşhur müğənnisi Mustafa Sandalın həyat yoldaşı Melis Sütşurup Sandal investisiya fondları ilə bağlı aparılan araşdırma fonunda gündəmə gəlib.
"Habertürk"ün məlumatına görə, Melis Sandal haqqında yayılan 4 milyard 316 milyon lirəlik (təxminən 145,5 milyon manat) vəsaiti geri qaytarması barədə xəbərləri təkzib edib.
O bildirib ki, oktyabrın 27-də Türkiyənin Əmanətlərin Sığortalanması Fonduna (TMSF) 1 milyard 570 milyon 504 min 365 lirə (təxminən 53 milyon manat) qaytarıb.
Melis Sandalın sözlərinə görə, bu addımı hər hansı ittihamı qəbul etdiyi üçün deyil, qanun pozuntusu iddiaları ilə gündəmə gələn investisiya fondlarından qazandığı pulu özündə saxlamaq istəmədiyi üçün atıb.
Mustafa Sandal isə daha əvvəl həyat yoldaşı və qayınatası ilə heç bir ortaq biznesinin olmadığını, 32 ildir yalnız musiqi sahəsindən gəlir əldə etdiyini açıqlamışdı.