“Yolumuz Ağdama” və “Füzuli və Xocavəndə” adlı birgünlük turların layihəsi hazırlanıb, Şuşa şəhərinin və Daşaltı kəndinin turizm inkişaf planı hazırlanaraq, aidiyyəti üzrə təqdim edilib. Bunu Dövlət Turizm Agentliyinin sədri Fuad Nağıyev bildirib.
Bu barədə 14 dekabr tarixində Report məlumat verib.
Onun sözlərinə görə, son iki ildə qurum Qarabağın və Şərqi Zəngəzurun turizm potensialının öyrənilməsini, müvafiq olaraq, konsepsiya sənədlərinin və layihələrin hazırlanmasını həyata keçirib.
"Bütövlükdə Füzuli, Xocavənd, Cəbrayıl, Zəngilan, Qubadlı, Kəlbəcərin turizm imkanlarının qiymətləndirilməsi aparılaraq, işğaldan azad edilmiş ərazilərdə turizmin inkişafı ilə bağlı Regional Turizm Strategiyası və Fəaliyyət Planının layihəsi hazırlanıb. Yaxın günlərdə Şuşaya turizm səfərlərinin təşkil edilməsi üçün işlərimizi yekunlaşdırmaq üzrəyik. Artıq vətəndaşlarımız digər yerlərə olduğu kimi, Şuşaya da turizm səfərləri edəcəklər”, - deyə sədr əlavə edib.
