Quldurluqda şübhəli bilinənlər yol polisi tərəfindən aşkarlanıblar. Bu barədə dekabrın 8-də DİN-dən bildirilib.
Belə ki, Bakı-Qazax avtomobil yolunun Kürdəmir rayonu ərazisindən keçən hissəsində “Volkswagen” markalı avtomobil DYP əməkdaşları tərəfindən saxlanılıb.
Yoxlama zamanı sürücünün - Ağdam rayon sakini Orxan Musəvinin sürücülük vəsiqəsinin olmaması məlum olub. Bu zaman avtomobildə olan sərnişinlər - Cəbrayıl rayon sakini İlqar Xəlilov və Ağdam rayon sakini Həsən Əliyev özlərini şübhəli apardıqlarından polis əməkdaşları onları da portal vasitəsilə yoxlayıblar.
Yoxlama zamanı O.Musəvinin və İ.Xəlilovun Cinayət Məcəlləsinin “quldurluq” maddəsi ilə axtarışda olmaları müəyyən olunub. Onlar saxlanılaraq Kürdəmir Rayon Polis Şöbəsinə təhvil veriliblər.
Onların üzərinə baxış zamanı İ.Xəlilovdan 6 007 ABŞ dolları və 996 manat, O.Musəvidən 6 200 manat pul, H.Əliyevdən isə narkotik vasitə aşkar olunaraq götürülüb.
Araşdırmalarla O.Müsəvi və İ.Xəlilovun noyabrın 21-də paytaxtın Xətai rayonu ərazisindəki mənzillərin birində ev sahibindən 80 000 manat pul və 20 000 manat dəyərində qızıl-zinət əşyalarını quldurluq yolu ilə almaları da müəyyən olunub.
