Rusiya Dövlət Dumasının deputatı Mixayıl Delyaginə qarşı Azərbaycanda cinayət işi açılıb. Bu barədə martın 30-da Azərbaycanın Baş Prokurorluğu məlumat verib.
Belə ki, o, 28 mart tarixində Rusiyanın “Rossiya 1” telekanalında yayımlanan verilişdə Azərbaycana qarşı təcavüzkar müharibəni başlamağa açıq çağırışlar edib. Ölkəmizin enerji infrastrukturu və neft sənayesinin məhv edilməsi üçün nüvə silahından istifadə olunması barədə çıxış edərək, sosial media platformasında bu barədə kütləvi sorğu keçirib.
Mixayıl Delyaginə Azərbaycanın Cinayət Məcəlləsinin “təcavüzkar müharibəni başlamağa açıq çağırışlar”, “terrorçuluq-odlu silahdan və silah qismində istifadə olunan predmetlərdən istifadə etməklə törədilməklə hədələdikdə” və “milli, irqi, sosial və ya dini nifrət və düşmənçiliyin salınması” maddələrilə ittiham irəli sürülüb.
O, qeyd edilən maddələrlə təqsirləndirilən şəxs qismində məsuliyyətə cəlb edilərək, İNTERPOL vasitəsilə beynəlxalq axtarışa verilib.
Bir sıra tərəfdaş dövlətlərin səlahiyyətli orqanlarına sözügedən şəxsin həmin ölkələrə daxil olduqda dərhal tutularaq istintaqa cəlb edilməsi üçün Azərbaycana verilməsinin təmin edilməsi məqsədilə müraciətlər göndərilib.
