Azərbaycan dənizçilərinin şəxsiyyət sənədlərinin və sertifikatlarının (diplomların) etibarlılıq müddəti 30 iyun 2022-ci il tarixinədək uzadılıb. Bu barədə 30 mart tarixində Report məlumat verib.
Məlumata əsasən, bu qərar dənizçilərin rahatlığının və fəaliyyətinin fasiləsizliyinin təmin edilməsi məqsədilə qəbul olunub. Bildirilib ki, uzadılma Azərbaycan Respublikası, həmçinin xarici dövlət bayrağı altında üzən gəmilərdə çalışan dənizçilərimizin 1 sentyabr 2021-ci il tarixindən 31 mart 2022-ci il tarixinədək olan dövrdə etibarlılıq müddəti bitmiş şəxsiyyət sənədinə, “Dənizçilərin hazırlanmasına, onlara diplom verilməsinə və növbə çəkməyə dair” Beynəlxalq Konvensiyanın və milli qanunvericiliyin tələblərinə uyğun olaraq verilən sertifikatlara (diplomlara) şamil edilir.
Gəmiləri heyətlə komplektləşdirən aidiyyəti agentliklər, gəmiçilik şirkətləri və ya dənizçilər aşağıda qeyd olunan sənədlərlə birlikdə etibarlılıq müddətinin uzadılmasına dair müraciət formasını Dövlət Dəniz və Liman Agentliyinin [email protected] elektron ünvanına təqdim etməlidir:
– gəmiləri heyətlə komplektləşdirən aidiyyəti agentliklər, gəmiçilik şirkətləri və ya dənizçilər tərəfindən uzadılma səbəbinin əsaslandırılmasına dair məktub;
– mövcud şərtlərə əsasən, liman və ya miqrasiya qurumundan dənizçinin gəmini tərk edə bilməməsi barədə yazılı bəyanat və ya rəsmi bildiriş;
– əmək müqaviləsinin surəti.
