Dünən, martın 27-də Azərbaycanın keçmiş Prezidenti Ayaz Mütəllibov vəfat edib.
Ayaz Niyazi oğlu Mütəllibov 12 may 1938-ci ildə Bakıda anadan olub. O, 1962-ci ildə keçmiş Azərbaycan Neft-Kimya İnstitutunu bitirib. Əmək fəaliyyətinə 1958-ci ildə elmi-tədqiqat institutu bürosunun böyük texnik-konstruktoru kimi başlayıb. 1959-1974-cü illərdə Bakı məişət elektrik cihazlar zavodunda müxtəlif yüksək vəzifələrdə çalışıb, 1974-cü ildən “Bakelektroməişətmaş” istehsalat birliyinin baş direktoru olub.
Ayaz Mütəllibov 1963-cü ildə Sovet İttifaqı Kommunist Partiyasına üzv qəbul edilmişdir, 1979-cu ildə respublikanın yerli sənaye naziri təyin olunmuşdur.
1989-cu ildən Mütəllibov Azərbaycan SSR Nazirlər Sovetinin sədri, Azərbaycan Kommunist Partiyası Mərkəzi Komitəsi bürosunun üzvü, 1990-cı ildən Azərbaycan Kommunist Partiyası Mərkəzi Komitəsinin birinci katibi kimi çalışıb. Həmin il o, Azərbaycan SSR-in Ali Soveti tərəfindən Azərbaycan SSR-nin Prezidenti seçilib.
8 sentyabr 1991-ci ildə Ayaz Mütəllibov ümumi seçkilərdə Azərbaycanın ilk Prezidenti seçilib. O, 1992-ci il martın 6-da vəzifəsindən istefa verib.
Həmin vaxtdan etibarən 2012-ci ilə qədər Moskvada yaşayıb, sonra yenidən Azərbaycana qayıdıb. Mütəllibov 27 mart 2022-ci ildə uzun sürən xəstəlikdən vəfat edib. Azərbaycanın sabiq Prezidenti I Fəxri xiyabanda dəfn ediləcək.
