Əsəd Soltan oğlu Əsədov 22 mart 1956-cı ildə Zəngilan rayonunun Turabad kəndində anadan olub.
Əsədov Mincivan qəsəbə orta məktəbində təhsil alıb. O, 1975-ci ildə hərbi xidmətə çağırılıb. Hərbi xidmətini sona çatdırdıqdan sonra Əsəd Rusiyanın Saratov vilayətinin Krasnokutsk şəhərindəki Təyyarəçilik Məktəbinin (indiki İ.F.Vasina adına Krasnokutsk Mülki Aviasiya Uçuş Məktəbi) mülki aviasiya şöbəsinə daxil olub. 1976-cı ildə o, təyyarələrin uçuş istismarı peşəsinə yiyələnərək Yevlax Mülki Aviasiya İdarəsində çalışmağa başlayıb.
Birinci Qarabağ Müharibəsində erməni işğalçılarının Azərbaycanın torpaqlarına hücumu zamanı o, mübarizədə iştirak edib. Yevlax Aviasiya Şirkətinin AN-2 təyyarəsinin komandiri Qarabağ səmasında bir çox uğurlu uçuşlar keçirib. Lakin 29 oktyabr 1991-ci ildə AN-2 təyyarəsi Xanabad kəndi üzərindən uçarkən düşmən tərəfindən atəşə tutuldu. Həmin zaman təyyarədə olan Əsədov və heyət üzvləri həlak oldular.
Hərbçimiz Zəngilan rayonunda dəfn edilib. 25 noyabr 1992-ci ildə Əsəd Soltan oğlu Əsədov ölümündən sonra “Azərbaycanın Milli Qəhrəmanı” adına layiq görülüb. Hazırda Zəngilan rayon Turabad kənd orta məktəbi və Mincivan qəsəbəsindəki mərkəzi küçələrdən biri onun adını daşıyır.
