Azərbaycan Xarici İşlər Nazirliyi (XİN) Ermənistan XİN-nin Azərbaycanın Qarabağ bölgəsindəki vəziyyətlə bağlı iftira xarakterli bəyanatını rədd edib. Bu barədə martın 29-da Azərbaycan XİN məlumat yayıb.
Ermənistan tərəfinə xatırladılıb ki, Azərbaycanın suveren əraziləri ilə bağlı edilən şərhlər bu ölkənin Azərbaycanın daxili işlərinə qarışmaq cəhdidir və beynəlxalq hüquq pozuntusudur: “30 ilə yaxın güc tətbiq etməklə Azərbaycanın ərazilərinin bir hissəsini hərbi işğal altında saxlayan Ermənistan beynəlxalq hüquq pozuntusunu vərdiş halına gətirib”.
Qeyd olunub ki, Ermənistan üçtərəfli bəyanatın müddəalarını pozaraq erməni silahlı qüvvələrinin qalıqlarını hələ də bölgədən çıxarmır və Laçın dəhlizi vasitəsilə hərbçilərin bölgəyə göndərilməsini davam etdirir: “Azərbaycanın tələbi ölkənin Qarabağ bölgəsində yaşayan erməni əsilli vətəndaşlarına yox, qanunsuz erməni hərbi birləşmələrinin qalıqlarının bölgədən çıxarılmasına aiddir”.
