Dövlət Gömrük Komitəsi ölkəyə idxal olunan ekoloji təmiz avtomobillərin idxal rüsumundan azad olunması üçün hökumətə müraciət edib. Bu barədə 29 mart tarixində Report Komitənin Gömrük ödənişləri idarəsinin rəisi Tariyel Alverdiyevə istinadən məlumat verib.
"Hazırda həmin avtomobilləri Azərbaycana gətirənlər yalnız əlavə dəyər vergisi (ƏDV) ödəmir. Hökumətə təklif etmişik ki, idxal rüsumunun dərəcəsi də 0% olsun", - deyə o qeyd edib.
Bundan əlavə, məlumatda qeyd olunub ki, sözügedən ekoloji təmiz nəqliyyat vasitələrindən istifadənin stimullaşdırılması ilə bağlı qiymətləndirilmələrin aparılması, təkliflərin hazırlanması və həyata keçirilməsi üzrə Yol Xəritəsi hazırlanıb.
Yol Xəritəsini hazırlamış İşçi Qrupun üzvü bildirib ki, ölkəmizə idxal olunan köhnə avtomobillərin sayı azalır, daha müasir və ekoloji təmiz avtomobillərin sayı isə artır.
