Azərbaycana qaçaqmalçılıq yolu ilə narkotik keçirilməsinin qarşısı bir daha alınıb. Bu barədə İnsanoid bu gün, 6 yanvar tarixində xəbər verir.
Yanvar ayının 5-də saat 09:53-də Beyləqan rayonunun Birinci Şahsevən kəndi yaxınlığında yerləşən sərhəd zastavasının xidməti ərazisində 2 nəfər naməlum şəxs İran - Azərbaycan dövlət sərhədini pozub. Sərhəd naryadı tərəfindən “Dayan” əmrinin verilməsinə və havaya xəbərdarlıq atəşinin açılmasına baxmayaraq, sərhəd pozucuları ərazinin sıx qamışlıq olmasından istifadə edərək geri, İran ərazisinə qaçıblar .
Ərazidə pilotsuz kəşfiyyat uçuş aparatı vasitəsilə keçirilmiş sərhəd axtarışı və əməliyyat tədbirləri nəticəsində 2 ədəd bağlamada 21 kiloqram 600 qram narkotik vasitə “marixuana” aşkar olunaraq götürülmüşdür.
Həmin gün saat 20:20-də Füzuli rayonunun Birinci Mahmudlu kəndi yaxınlığında yerləşən sərhəd zastavasının xidməti ərazisində 2 nəfər naməlum şəxs İran İslam Respublikasından Azərbaycan Respublikası istiqamətində dövlət sərhədini pozub. Onlar “Dayan” komandasına və xəbərdarlıq atəşinə məhəl qoymayaraq qaçmağa cəhd göstəriblər.
Sərhəd pozucularından birinə yaxalamaq məqsədilə silah tətbiq edilərək ayağına atəş açılıb.
Saxlanılan şəxsin üzərindən 1 (bir) ədəd xəncər aşkar edilib. Yaralanmış şəxsə sərhədçilər tərəfindən ilkin tibbi yardım göstərildikdən sonra Füzuli rayon Mərkəzi Xəstəxanasına təxliyə olunub.
Ərazidə aparılmış axtarış tədbirləri nəticəsində qamışlıqda gizlənmiş digər sərhəd pozucusu saxlanılmış, baxış zamanı 1 ədəd bağlamada 6 kiloqram 400 qram narkotik vasitə olan “marixuana” (xırda bükümlərdə “metamfetamin”, 1000 ədəd psixotrop tərkibli “gapaprel” həbləri) və 1 ədəd bıçaq aşkar olunaraq götürülmüşdür.
Araşdırma zamanı saxlanılan şəxslərin İran İslam Respublikasının Parsabad şəhər sakinləri 34 yaşlı Əli Şeyxniya və Poya Əlipur olduqları müəyyən edilib.
Yanvar ayının 6-da saat 00:15-də Beyləqan rayonunun İmamverdili kəndi yaxınlığında yerləşən sərhəd zastavasının xidməti ərazisində keçirilmiş tədbirlər nəticəsində Bakı şəhər sakini 30 yaşlı Solmaz Həsənova saxlanılıb.
Onun üzərinə baxış zamanı 1 ədəd bağlamanın içərisində ümumi çəkisi 15 kiloqram 100 qram narkotik vasitə (14 kq 500 qram “marixuana”, 600 qram “tiryək”, 1300 ml maye halında “metadon M-40”, 1560 ədəd psixotrop tərkibli həblər və 10 ədəd “sinarolac” göz damcısı) aşkar olunaraq götürülüb.
Qeyd olunan faktlar üzrə əməliyyаt-istintaq tədbirləri dаvаm еtdirilir.
