Azərbaycan Kanoe və Avarçəkmə Federasiyası (AKAF) 2023-cü ilin ilk idman tədbirini Xəzər dənizində təşkil edib. Bu barədə Report 7 yanvar tarixində xəbər verib.
Bakıda baş tutan turniri yerli sakinlərlə yanaşı, gənclər və idman naziri Fərid Qayıbov və müavini Mariana Vasilyeva da izləyiblər.
İdmançılar 1, 2 və 4 nəfərlik akademik, həmçinin 1 və 2 nəfərlik kayak qayıqlarında yürüşlər ediblər.
Ziya Məmmədzadə, Bəhmən Nəsiri kimi yığma komandamızın titullu idmançılarının da iştirak etdiyi yarışda ümumilikdə Mingəçevirdən və Bakıdan olan 49 avarçəkən 8 dəst medal uğrunda mübarizə aparıb.
Turnirin qalibləri diplomla mükafatlandırılıblar.
Tədbir zamanı, həmçinin Azərbaycan Kanoe və Avarçəkmə Federasiyasının yaxın zamanda səyyar görüşlərə start verəcəyi və bu görüşlərə Bakıdan başlanacağı haqda məlumat diqqətə çatdırılıb.
Bu cür səyyar görüşlər Azərbaycanın bütün bölgələri üçün nəzərdə tutulub.
[caption id="attachment_100743" align="alignnone" width="640"]
Foto Report.az saytı[/caption]
