Şəki Apellyasiya Məhkəməsi Göyçayda bacısı qızını boğaraq öldürməkdə təqsirləndirilən Vüqar Bədəlovu 14 il 6 ay müddətinə azadlıqdan məhrum edib. Bu haqda martın 29-da Report məlumat verib.
Hadisə 2021-ci il mayın 9-da Göyçay rayonu, Bığır kəndi ərazisində qeydə alınıb. Kənd sakini, 2002-ci il təvəllüdlü Fatimə Məmmədova dayısı Vüqar Bədəlov tərəfindən yastıqla boğularaq qətlə yetirilib.
İttihama görə, dayı bacısı qızını namus üstə öldürüb. F. Məmmədova nişanlı olub. Lakin o, sonradan nişanlı ola-ola evdən qaçıb və yenidən evə qayıdıb.
Hadisə günü F. Məmmədova evdə uca səslə telefonla danışıb. Dayısı isə ona irad bildirib. Daha sonra qız dayısını təhqir edib. Gecə V. Bədəlov F. Məmmədova yatan zaman onu yastıqla boğaraq öldürüb.
Xatırladaq ki, V. Bədəlov ifadəsində F. Məmmədovanın TikTok-da bir çox videogörüntülərinin yayıldığını deyib.
