19 mart 1994-cü ildə, saat 13:00 radələrində Bakı Metropoliteninin “20 Yanvar” stansiyasında terror aktı törədilmişdir. Partlayış nəticəsində 14 nəfər həlak olmuş, 49 nəfər isə yaralanmışdır.
Qatarın baş vaqonuna saat mexanizmli əldə düzəltmə bomba qoyulmuşdur və qatar stansiyada dayanan zaman işə düşmüşdür. Həlak olanların arasında xalq artisti Rafiq Babayev də olub. Terror aktının icraçısı Oqtay Qurbanov da partlayış zamanı ölüb.
Məhkəmə orqanları törədilmiş terror aktının Ermənistan xüsusi xidmət orqanları tərəfindən hazırlandığını və separatçı “Sadval” təşkilatının üzvləri tərəfindən həyata keçirildiyini sübut etmişdir. Müəyyən olunmuşdur ki, təşkilatın həmin fəalları 1992-ci ildən etibarən dəfələrlə Ermənistanda olmuş, terror-təxribat hazırlığı keçmişdir.
Partlayışın törədilməsində ittiham olunan “Sadval” təşkilatının 30 üzvü cinayət məsuliyyətinə cəlb edilmişdir.
