Bakı-Quba yolunun deformasiyaya uğramış hissəsinin yenidənqurma işləri yekunlaşmaq üzrədir. Bu barədə 15 dekabr tarixində AAYDA məlumat verib.
Hazırda M1 magistral yolunda yeni asfalt-beton örtüyünün sərilməsi, layihə üzrə zəruri yerlərdə drenaj işləri və beton küvetlərin tikintisi davam etdirilir. Görülən işlərə paralel olaraq yol nişanları, məlumatverici lövhələr, siqnal dirəklərinin quraşdırılması, yolcizgi və yolgöstərici xətlərin çəkilməsi işləri də yerinə yetirilir.
İşlərin aparıldığı ərazidə avtonəqliyyat vasitələrinin hərəkəti tam olaraq məhdudlaşdırılıb. Təmir-bərpa işləri aparılan müddət ərzində əks-istiqamət üzrə 2 tərəfli hərəkət təmin edilib. 2 tərəfli hərəkətin təhlükəsiz və maneəsiz təmin olunması üçün ərazidə əlavə təhlükəsizlik tədbirləri görülüb, müvafiq nişanlanma xətlərinin çəkilişi və müvəqqəti yol nişanlarının quraşdırılması işləri aparılıb.
